3 (ný)lög í spilaranum

Ekkert annað nafn (endurgerð)
Heilagur
Gatnamót

Þetta eru allt lög sem áttu að fara á plötuna mína ,,Að krossinum vil ég koma Kristur" en urðu að víkja vegna lengdar plötunnar. Kannski hefðu þessi komið betur út en einhver önnur á plötunni, en þetta var ákvörðun sem ég tók þá en vil gjarnan hafa þau í spilun hér á síðunni og hef því ákveðið að opinbera þau hér í tónlistarspilaranum til vinstri.

Ykkur er frjálst að kommenta lögin og ég mun örugglega setja inn fleiri lög von bráðar. Ég á nóg af demóum fyrir næstu plötu. Það getur vel verið að ég setji eitthvað af þeim hér.

Ótalsett og ótextað fyrir börnin...

Var að koma úr laugardagsnammileiðangri í Hagkaup sem er kannski ekki í frásögu færandi nema þá helst af því að ég sá gamla góða Aladdin frá Disney, sem Laddi, Siggi Sigurjóns, Felix Bergs, Örn Árna ofl. töluðu svo skemmtilega inná. Horfði oft á þetta með frænda mínum einu sinni sem ég passaði stundum og hafði sjálfur mjög gaman af. En nú áðan sá ég Aladdin til sölu í Hagkaup og það ótextaða og ótalsetta. Ég skil ekki af hverju? Eru börnin farin að læra ensku í leikskóla eða...? Á DVD kemur ekki að sök fyrir innflutta að kaupa textað og talsett þar sem hægt er að velja um tungumál og texta, en ég skil ekki af hverju hingað til lands kemur ótextað og ótalsett barnaefni.

Sveitasæla 6 og heimferð

Jæja!

Þá, kom að því að fríið kláraðist, byrjaður aftur í vinnunni en okkur tókst ýmislegt, kannski hefði mátt gera betur, en þetta var allavega að gaman að mestu og sérstaklega eftir að Rebekka kom til okkar með alla sína orku.  Hún smitar frá sér með gleðinni sinni og maður getur ekki annað en glaðst með henni.

Allavega kláraðist pallurinn sem var í smíðum og svo var skipt um gler í all flestum gluggum í húsinu. Einnig málaði ég slatta, inni sem úti, spítur í klæðningu á annan stafninn, glerlista fyrir gluggana, nokkra dyrakarma og svo var líka hangið í Sudoku eða gónt út um nýju glerin þegar ringdi. Veðrið var nokkuð slæmt síðustu vikuna og þessvegna ekki mikil útivinna en þó merkilega mikil miðað við veðrið.

Jú, svo enduðum við á kartöfluuppskeru nokkuð magnaðri. Eigum eitthvað til vetrarins, mjög góðar gullauga.

Þetta er ágætissamantekt. Svo auðvitað kíkkar maður um helgar og eynir að gera eitthvað líka þá...

Dagvaktin vs Svartir englar?

Ég fór nú að velta því fyrir mér, þegar ég heyrði af veseninu sem komið var upp með sýningartímana á annarsvegar ,,Dagvaktinni" á ,,Stöð2" og hins vegar ,,Svörtum englum" á ,,RUV". Á sama tíma? En hvað með ,,plús" rásirnar? Allir, ég held að ég sé ekkert að ýkja með það, en allir sem eru áskrifendur af ,,Stöð 2" eru sjálfkrafa áskrifendur að ,,Stöð 2+" í gegnum ,,Digital Ísland" þar sem dagskráin er sýnd með klukkustundar seinkun og svo eru þeir líka með aðgang, að ég held, að ,,RUV" og ,,RUV+". Plús merkið segir semsagt til um klukkutíma seinkun. Einnig eru margir með aðgang að ,,Breiðbandi Símans" og svo aðrir með ,,Sjónvarp Símans" þar sem einnig er hægt að finna plús rás ,,RUV". Þetta hefði ekki verið neitt vandamál. Fyrst yrði horft á ,,Dagvaktina" á ,,Stöð 2" og svo ,,Svarta Engla" á ,,RUV+" eða öfugt, ,,RUV" fyrst og síðan ,,Stöð 2+".

Svo gerðu þeir mál úr þessu og nú er Þórhallur búinn að breyta sýningartíma Svartra Engla til þess að friða... ja, hverja...?

OK, hverjir eru ekki áskrifendur að Stöð 2 ? Kannski þeir sem ekki tíma að borga 5000 - 6000 krónur eða meira á mán. í viðbót við RUV skattinn til að horfa á sjónvarp. Þeir missa sjálfkrafa af Davaktinni og kaupa hana á DVD þegar þar að kemur, eins og í fyrra og horfa þar af leiðandi kannski bara á Svarta Engla og málið er leyst.

Sveitasæla 5

Hér er blíða, þ.e. ef við sleppum að ræða um veðrið, semsagt sól í hjarta. Nú er hafin og hálfnuð síðasta vikan mín hér í þessu sumarfríi og vinna á mánudag... hvað er ég að rifja það upp, margir dagar þangað til...

Ég skrapp á mánudaginn og sótti hana Rebekku mína til að létta aðeins álaginu af Önnu minni svo Rebekka er búin að vera hér með okkur að hjálpa til. Ekki veitir af svo orkumiklum starfskrafti. Hún er búin að hjálpa mér að mála glerlista, taka til í dúkkuhúsinu hennar ofl. Svo er bara svo líflegt að hafa hana hér. Hún eiginlega stjórnar hér með harðri hendi og við bara hlíðum.

Svo var hér í gærkveldi nokkuð líflegt ef litið er til veðurs. Þegar ég kom fram, eftir að hafa svæft Rebekku, var tengdó búinn að fara út og festa eitt og annað niður hér á lóðinni, enda eins gott, húsið nötraði og skalf og mér leist ekki mjög mikið á blikurnar, en reyndi samt að dreifa huganum við málun á dyrakörmum hér inni, sudoku ofl. Svo ætlaði ég ekki að geta sofnað fyrir látumnum og kannski stressi, en þetta var nú held ég hálfgerð móðusýki í mér. Húsi er nokkuð öruggt. Allavega stóð það af sér stærri hvelli í fyrravetur, t.d. þegar tengdó vaknaði standandi eina nóttina sökum vinda sem skullu á húsinu.

Í morgun þegar við Rebekka vöknuðum og fórum út, þá höfðu búkkar, nokkuð þungir, fokið eina fimm metra fram af pallinum og plaströr, sem við héldum að væri í skjóli, hafði fokið til.

Annars skruppum við Rebekka í dag, á milli regnskúra, til að finna nokkur ber. Það var ekki mikið upp úr því að hafa þar sem allt var svo blautt, hendur kaldar og rollur, sem gleymdist að smala um daginn, búnar að narta í lingið.

Sveitasæla 4 og nýtt og betra útsýni...

Í dag vaknaði ég við þessa líka svaka rigningu og rigndi allan morguninn.  Svo þegar ég nennti ekki lengur að liggja og hlusta á regnið var best að drattast á fætur og vita hvort ekki væri hægt að finna sér eitthvað annað en útimálningarvinnu að gera. Ég allavega þurfti að fá mér morgunmat og stökk fram í eldhús og VÁÁÁÁÁÁ!!!! Þetta líka glaða sólskin. Þá var bara að bíða eftir að timbrið þornaði úti og það tók nú sinn tíma.

En allt hefst fyrir rest og nú er ég búinn með fjalirnar hér úti á hlaði. Þær fara seinna utan á annan stafninn. Hann er ljótur að sjá, gamlar og fúnar spítur klæða stafninn og við ætlum að bæta úr því.

Eitt og annað var gert í dag og meðal annars skipt um gler í glugga á sama stafni. Glerið sem var var svo rakt að innan að maður þurfti alltaf að hagræða sér í glugganum til að sjá út um hann. En nú er það úr sögunni og maður gat bara varla hætt að góna út um gluggan eftir að nýja glerið kom í. Það er ekki mikið mál að setja gler í, en að ná því gamla úr er svoddan hausverkur. Skrúfurnar eru hreinlega ekkert að hrökkva úr glerlistunum.

Nú sit ég hér við tölvuna og hlusta á rokið og rigninguna fyrir utan og ætti að vera löngu farinn að sofa,  en bara varð að blogga smá.

Sveitasæla 3 - farinn og kominn

Skrapp í bæinn í gær í glerleiðangur. Vorum að fá nýjar rúður í húsið og stefnum að því að skipta út öllu gleri í húsinu, þ.e. þegar þannig viðrar. Ekki mikil blíða þessa dagana... jæja og þó... Sjáum til. En allavega náði ég að gista heima hjá mæðgunum mínum eina nótt. Vað aðeins farinn að gleyma hvað rúmið mitt heima er fínt. Gott að heilsa aðeins upp á sína og kíkkaði líka með Önnu á þá Frank og Casper í danska trúðnum á RUV og skemmtum okkur nokkuð vel yfir vitleysunni þar. Rölti svo með Rebekku á leikskólann í morgunn og fór svo og sótti glerið og brunaði svo beint upp í sveit. Var í mismiklu vinnustuði í dag, tókst þó að mála slatta af spítum og pússa spartl á dyrakörmum. Tengdapabbi stóð í bókhaldsveseni í dag svo ekki smíðaði hann mikið, en fékk þó eitthvað greitt af útistandandi skuldum. Ekki veitir af á þessum tímum niðursveiflu.

Skruppum aðeins í Borgarnes í dag c.a. 3svar. Eitt og annað sem þurfti að útrétta og í síðustu ferðinni keypti tengdó tilbúinn kjúkling sem við átum hér með bestu list og urðum mettir.

Nú er bara að fara að hvíla sig og vera endurnærður fyrir mikla vinnu á morgunn, allavega erum við komnir með efni í mikla vinnu eftir allar Borgarnesferðirnar.

P.S: Fyrir þá sem botna ekki þetta tal um Brogarnes, þá erum ið c.a. 10 min. akstur frá Borgarnesi.

Sveitasæla 2

Þá er ég búinn að vera hér í 1 og 1/2 viku nánast samfleitt, misduglegur, eins og kom fram í síðustu færslu.

Í morgunn vaknaði ég við eitthvað klukkan 5. Veit ekki hvað en ég bara vaknaði og var næstum farinn á fætur þegar ég man ekki meir sirka tveim tímum síðar. Svo vaknaði minn grunlaus um klukkuna um klukkan 12 á hádegi. Það fer allt úr skorðum þegar maður vaknar á nóttunni. Öll hvíldin fyrir bí.

Pallurinn, sem er í smíðum, er strand þar sem okkur vantar ákveðin járn sem þarf að festa á húsið til að verja sökkulmotturnar fyrir regni ofl. Járnin eru í pöntun og bíðum við bara eftir þeim, svo að pallurinn bíður í bili. Tengdapabbi hins vegar dó ekki ráðalaus og skellti í einn glugga. Það er semsagt ætlun vor að saga gat hér á einn vegg á húsinu og smella þessum fína glugga í, sem hann smíðaði sem snöggvast í dag. Það er ótrúlegt hvað smiðir eru græjaðir í dag. Bara portable smíðaverkstæði í skottinu á jeppanum og svo Púfff!!!! eitt stk, gluggi takk.

Ég mokaði og mokaði og mokaði og mokaði... bíddu hvað gerði ég meira í dag?... Já, ég mokaði og mokaði líka. Jæja ég finn hvernig kílóin kvarnast af mér.

Svo eldaði ég þessar fínu kjúklingabringur á grillinu í kvöldmatinn. Þær brögðuðust með eindæmum vel, þar sem ég kriddaði þær á sunnudag. Annars sér tengdó um eldamennskuna að mestu. Ég fæ stundum að grilla, mér er treyst fyrir því öðru hvoru.

Jæja góða nótt að sinni.

Sveitasæla

Erum hér tveir í sveitinni, ég og tengdapabbi. Erum semsagt að vinna í bústaðnum. Ég er kominn í þrælavinnu að moka möl undir einn pallinn sem er frekar mikið bogr og vesen, en ég svitna og verð orðinn nettur og fínn þegar ég kem aftur til byggða 

Annars er ég að grípa í handlang hjá tengdapabba þar sem hann er að reisa annan pall. Þá get ég kastað mæðinni frá mokstrinum í nokkur andartök í senn.

Í dag erum við búnir að vera duglegri en alla síðustu viku þar sem við vorum í letikasti til skiptis. Þá náðum að vinna með nokkrar spítur, hann negldi þær og ég málaði þær. Góð samvinna. En nú erum við komnir í stuð. ég er meira að segja með inni djobb líka ef hann skildi rigna. Hér eru nokkrir dyrakarmar sem ég var að spartla í kvöld þegar rökkva tók. Svo á morgunn, eða næst þegar rignir eða rökkvar get ég pússað þá og málað. Frábært.

Ef ekki rignir mikið á morgunn, þá verðum við kannski aftur duglegir. Kemur í ljós.

Svo kíkka mæðgurnar mínar við um helgar. Kannski kíkkum við í ber um næstu helgi. Hver veit?

Best að fara að sofa og safna orku fyrir bogrið á morgunn.

Tilkynning um andlát...

Já, hún lést í dag... þ.e. blessuð lirfan.

Ég spurði Rebekku, þegar mér fannst hún ekki sinna lirfunni sem skildi, hvar er lirfan? Þá var svarað, algerlega án tilhlýðilegrar virðingar og mjög þurrt, ,,hún er dáin, hún hreyfist ekki" og svo haldið áfram að leika við vinkonuna sem var í heimsókn. Hún syrgði ekki einu sinni.

Jæja, það var ekki fyrr en í kvöld sem ákveðið var að henda lirfunni fram af svölunum með smá athöfn. Athöfnin var semsagt sú að líkið var kysst og svo hent niður svo það lenti í grasinu fyrir neðan. Jæja, það var þá tæpur sólarhringur sem Rebekka sannaði sig sem dýravin. Ég veit ekki hvort að hún hafi staðist prófið um að fá gæludýr...